رئيس مجلس الإدارة : ياســـر رزق       رئيس التحرير : طارق الطاهر
ساحة الإبداع

الدم نازف ع الأدان


حسام العقدة
12/2/2017 10:25:19 AM

الدم نازف ع الآدان
في براءة الحلم اللي كان
حدوته كانت من زمان
فوق السطوح..
عن الغيلان..
أو ديب رهيب..
وكانت القصه تقول..
عن قد إيه الغول.. جبان
كانت خيال..
كانت محال..
وما كانش فيه أي احتمال
غير إن طفل الحلم يكبر
قبل امّا غول القصه يكتر..
والدم ينزف ع البيبان.. وع البيوت
متخيلين إن البلد.. ممكن تموت!
لكننا..
أحلامنا لِسَّه بتتولد..
وحتي لو بنشيل يوماتي ميت تابوت
وحتي لو تاه الجواب.. في الأسئلة!
مين العدو..؟!
مين الحبيب..؟!
مين اللي عايش وسطنا.. مين الغريب؟!
وجراحنا ليه رافضه تطيب؟
الدم نازف ع الأدان..
لكن كمان..
الدم نازف ع الصليب.