رئيس مجلس الإدارة : ياســـر رزق       رئيس التحرير : طارق الطاهر
البريد

نص

نوبة سرحان


9/16/2017 11:51:43 AM

قافل ع الوضع الحالي الباب
خايف من خوفك من بكرة
علامات استفهام وحساب
وتعجب موجود بالفطرة
مستقبل أو يمكن شئ
بيدور حوالين نفس الفكرة
والباقي من الماضي دولاب
تلاجة بتحفظ كام ذكري
وشرايط لمنير وفؤاد
وشرايط لأصالة وذكري
وشرايط دايما تتعاد
بمجرد ماتكون وحديك
ومضارع من كتر فراغه
عمال بيقلد فـ ماضيك
وحبيبتك من أصل وصورة
بتحبك وأنت كمان لكن
الأصل أساساً مش ساكن
غير صورة بتدبل فـ ايديك
ومرايتك مكسورة ازازها
مضطرة تجاملك وتسايرك
والسقف بينشع ألغازها
فـ ينقط حيرة علي ملايتك
وسريرك من يوم ما صاحِبته
بقي جنبك صاحب يراضيك
والباقي من الناس وأصحابك
(FAKE) أرقامهم ورسايل   
تختصر الفاضل م الباقي
فتلاقي الفاضل حواليك
بلكونة وكرسي وإنسان
بملامح تشبه لماضيك
وبواقي القهوة ودخان
لسجارة بتلسع في ايديك
تامر عابد
الإسماعيلية