رئيس مجلس الإدارة : ياســـر رزق       رئيس التحرير : طارق الطاهر
البريد

في المولـد


12/16/2017 10:15:50 AM

تتوه أرواحنا في المولد
ونتدروش كما الدراويش
ندوّر وسطنا لينا
علي حاجة عشانها نعيش
نصاحب نجمنا العالي
ف نعلي وبردو منطلهوش
نحس بعجزنا نبكي
ف نجرح روحنا منسميش
سباق ورجول تمد ف مشيها تنهج
سحابه وغطت المسرح
ببص لدنيتي ف اسرح
ياريت لو كنت مش إنسان
ياصاحب رحلتي فينك؟
بدور ع السنين وبلف
ببص بعين قتيل خايف
وبمشي ف رحلتي للخلف
حبايبي شبه شئ شاحح
معارفي عدّو ألف الألف
يادايرة دايرة تجمعنا
بناس وسنين وبحر دموع
ياحب ف عصرنا ممنوع
يا لقمة عيش ف إيد محروم
في واحد وحدو مش باين
ف ركن العمر بيعيط
وحد ف جرحو بيخيط
وحد بيشتكي للبحر
أنا من بين كتير أشخاص
حياتي كإنها رافضة
حياتي وحالفة لتعاند
مكنتش عندهم أولي
ولا جربت اكون 1
ولا دمّعت غير قهوة
وكرسي ف بار حزين ف الركن
أنا مسطول ب ليل أعمي
وفبراير وكام إنسان
وذكري محاصرة إحساسي
وكام  دمعة وكان ياماكان
في خلق سابتني قاصداها
وخلق ف رحلتي تاهو
في حاجة نفسي رفضاها
وحاجة خدتني وانا مغصوب
هسيب الكل يجرحني
وأشكي لربنا وادعي
وأملي ف ربنا إني
هنام غالب ومش مغلوب
 محمد أحمد العيسوي
الوادي الجديد