رئيس مجلس الإدارة : ياســـر رزق       رئيس التحرير : طارق الطاهر
ساحة الإبداع

قصيدتان


أبو السعود محمد
1/6/2018 10:53:21 AM

البنت اللي بتعرف في الأبراج
عاملة لي كشف حساب
وخداني عتاب
تضحك وتقولي
طبعك غلاب..
كداب..
بتدادي وتحابي الناس
وعاملي شجاع
وأنت الخواف
عشمان بزيادة
وكمشان..
بتروح تقفل للحلم بيبان
وتربس قلبك بالترباس
عارفاك..
برجك ناري معجون بتراب
طيب وعنيف
ودا طبع غريب
ما قابلتوش بين الأبراج
عصبي وكداب
مع إنه قلولي عليك شفاف
بيبان علي وشك كل أوصاف
برجك مايل الحال..
والحيلة..
بتخطط؟
آه بتخطط
وتربط كل وسيلة بوسيلة
بس حكايتك حكاية تقيلة
طويلة..
وبرجك نصه الناري ضلالي
هيولع قلبك..
والنص اللي ترابي
متغابي..
ممكن ينهار في يوم أو ليلة
كدابة أنا؟
لأ مش كدابة
أنت الكداب
وعصبي وخواف
هادي وعنيف..
متلخبطة فيك كل الأوصاف
كلك شفاف
وقلبي أنا شواف
وشك مكشوف
حبك كداب
كرهك كداب
صدقك كداب
كدبك كداب
ولا ألف كتاب وكتاب
هتلاقي فيه دي الأوصاف
وعلي فكرة..
ولا حتي أنا بعرف في الأبراج!.
صرة حزن
ولإنك ماتعلمتش تداري
عن كل عيون الناس
رجعت تفك في صرة حزن
في قلب حبيبتك
تميّل وتكيّل منها
علي كد ما تقدر
وزيادة..
وكأن الحزن دا كله
من حقك وحدك
أصبحلك عادة
عمال بتطول مشوارك
ولإن نهايته باين لها موتة
ولإنك متخلصتش من عقدة ذنب
إنك عايش..
طايش بأحلامك
بتبعتر فيها
كان نفسك تتوضي بريقها
وتطهر عشقك..
وتفك زراير روحك
وتطلع بوحك
زي الطفل الخايف
من طعم الضلمة
بيكفر أمه لسماع حواديتها
وتروح تحكيلك تتردد
وتدب كلامها في نن عنيك
ما بقتش صغير
ولإن سؤالك متحير
له ألف ملامح
بتعمل زي الحاوي
الغاوي يغلب كل الناس
وتغلب نفسك
وتمد خطاوي علي المسافات
فتمد لسانها
وتبعد أكتر.