رئيس مجلس الإدارة : ياســـر رزق       رئيس التحرير : طارق الطاهر
ساحة الإبداع

كل الحريم كارهة النفاس


محمد يوسف حامد
1/6/2018 10:54:35 AM


وقدرت تصبر ع البلاوي
كلها
وتعيش رسول
يا ضحكة ف عيون البتول
انظر لنا
إحنا الغلابة كلنا
كل البلاد ف مصرنا
محتاجة يد حنينة
وبسمة تطمن كل قلب
يمكن ينام راعي النعاج
لو ساب نعاجه ويا كلب
كل الدروب
محتاجه درب يلمها
وإحنا علي طول البلاد
متشحترين
زي الشعير
جوه أراضي
مش طايقها أي فاس
كل الحريم كارهه
النفاس
كارهه الولادة والحبل
كارهه العيال
كارهه الخبيز علي سطح
أحلام البنات
كارهه الجواز لما يموت
جوزها الفقير
خايفة يكون فوق حلمها
مليون غفير
سكة ضلال
دمعة
ومن أول الخلق اللي نازل
م السما مطرود
الدود جعان
مستني يفطر بالجسد
يمكن يكون داء الحسد
هوالسبب
في سفك روح الأبرياء
من وقتها
لسه الشيطان
بيوسوس ف صدر الغبي
علشان يتوب
ويتخلي عن كل الذنوب
يصبح ولي
لسه نبينا مبتلي
بحقد اليهود
وأمة بتشبه للقرود
بتنط من فرع لفروع
قطر الدموع
لسه بيسحب ضحكتين
وقعوا غلط
من زحمة السكة الضلال
شنط العيال
لسه ف طابور المدرسة
بتغني للنسر اللي مات
جوه العلم
مع أنه طاير ف السما
مع روح عيالنا الطيبين
اللي قتلهم قطر أسيوط
ف الصعيد
الدم دم
وأنتِ يا أمي بتحلبي
م الضلمه ضي
وتسمي علي بكرة
اللي جي
وتنقذيه علشان يكون
عيل عفي
يقدر يجيب الحلم لو
بالسيف
يا ليل أهاتك عجب
شيلتني يا هم -- هم
الدم مش أول علامته
انهيار
يمكن يكون وش النهار
رافض يبان
يمكن يكون جوه الجبان
مليون جبان
وست بتطبطب عليه
علشان ينام ف حضنها
زي القتيل
يا ليل أهاتك عجب
آهة جراح وآهة نكاح
وآهة كلاب تعبانه
من كتر النباح
علي ديب بيرمخ ف الخلا
بين النعاج
والراعي ناسي سبحته
وركعة تهجد ع النجيل
شمس الصباح لسه هتصبغ
شعرها
علشان تبان
يمكن تلاقي ف النهار
ضحكة ولي
ودمعة مسيح
يمكن تسيح علي بعضها
وتطرح وطن
شايل ف قلبه الطيبين.