رئيس مجلس الإدارة : ياســـر رزق       رئيس التحرير : طارق الطاهر
ساحة الإبداع

رسائل عباد الشمس


حسام العقدة
2/10/2018 9:06:09 AM

حبّك بقي اصعب م الحرمان
واكبر م الفرح.. وم الأحزان
متجاوز أي فنون.. وجنون
متجاوز أي زمان.. ومكان!
> > >
انا قلبي صحيح مولود في البرد
انّما لفّها بالطول.. والعرض
بيدوّر ع الدفا والأحلام
مستني الشمس.. تطول الأرض
> > >
دوّري علي حد.. يحبك قدّي
يقدر بين عشقه وصبره يعدي
تكوني له فصول السنة.. في دقيقة
تبني له آمال.. وفي لحظه تهدّي
> > >
وسط الأمطار.. مش لاقي رصيف
وف عز البرد كإني ف صيف
برسم لِك صورة في قلبي.. كده
محتاج اجمع ألوان الطيف!
> > >
لو كان العشق جنون
يبقي انا أول مجنون
ما يهمّش اكون في الدنيا
دي ملامحك كل الكون
> > >
جننتيني في شِعري.. ورسمي
رجعتيني مراهق رسمي
مش عارف راسي من رجليّه
ولا حتي بقيت فاكر إسمي !
> > >
انت تجنن قوي.. وتحيّر
عاشقك انا من وانت صغيّر
الحق بقي حبني أرجوك
حاسس إن العمر.. قُصيّر
> > >
قولي إيه في الحب بيخجِل
انا باكتب كله.. واسجّل
مستعجل اتوه في عينيكي
غير كده ممكن.. يتأجّل
> > >
انا في شفايفك آكل شارب
وعشان نظرة عينك.. احارب
مش ممكن أقفل باب حبي
انا علشانِك.. سيبتُه موارِب
> > >
انا عندي معاد ويّا شروقك
تحد في وسط شعاعك.. شوقك
تسيبيني اعيش في الدفا حبّه
تسيبيني بقي ف مرّه.. أدوقك
> > >
اللي شافتني زمان ويّاكي
كان لازم فعلا ترقيكي
بس نست ترقيني كمان
من سحر جمالك.. وعينيكي !
> > >
يا حبيبتي جمالك زي الورد
وأسيبُه ازاي بين حَر.. وبرد
محتاج ارويه أوّل باوّل
واعمل له عينيه السما.. والأرض
> > >
انت ما تقدرش تقاوم الحب
لو سهمه نَفَد.. ورشق في القلب
اذا شيلتُه يكون جرحك أكبر
واذا سيبته تموت برضه من الغُلب
> > >
بابقي جميل.. وانتي مرايتي
وباشوف في عينيكي حكايتي
ايّاكي يجري لِك حاجه
فعلا.. هتكون دي نهايتي
> > >
عاوز شِعر يصغّر سنّي
يلغي لي المسافات.. وياخدني
ويرجع لي الحب ف قلبك
ويجيبك مشتاقه لحضني
> > >
حاسس بدفا.. رغم الأمطار
وف وسط الدوشه اسمع.. أوتار
والأشعار.. ما عرفش ازاي
تخطر علي بالي ليل ويّا نهار!
> > >
هات قلبي وخُد قلبك تاني
انا مش واخد أبقي اناني
ولا قلبي هيتحمّل صبرك
ولا قلبك ده.. قد جناني
> > >
طب ممكن اعمل لِك تمثال؟
وكإنّي ف تفاصيلك.. رحّال
وأشوف حتّه بحتّه ف أرضك
وانام في كهوف.. واعدّي جبال
> > >
عطشان.. والميّه معاكي
عاشق مشتاق لهواكي
واحلف إنّي ابعد عنّك
وارجع.. اتمني رضاكي !
> > >
ثورات علي حبك.. واحتجاجات
بيطالب بيها القلب ساعات
وامّا بتيجي عينيكي في عينيّه
يتفجّر عشق.. وأغنيّات!
> > >
حُبنا مرْكِب.. سنتي بيفرق
والموج حوالينا عالي وأزرق
لو  لازم نبعد عن بعض
يمكن واحد مننا.. يغرق!
> > >
الدفا والهوي علي وشِّك فرض
وانا قلبي خلاص هيموت م البرد
اذا كنتي يا شمس بعيدة قوي
راعي إن هناك عشاق.. ع الأرض
> > >
كان نفسي اكون.. فعلا مجنون
مين اللي يلوم مجذوب.. مفتون
واتحرّش علي راحتي بجسمك
وأسيب افكاري لأي ظنون!
> > >
في الحب شفايفك.. موسوعة
وف قلبي الحواديت موجوعة
اكتب إحساسي ازاي عنّك
وعينيكي قصايد.. ممنوعة؟!.