رئيس مجلس الإدارة : ياســـر رزق       رئيس التحرير : طارق الطاهر
ساحة الإبداع

عصف جنون


مصباح المهدي
2/9/2019 12:06:42 PM

عديت علي الأبنودي
علي حداد
وقالولي يا ابني الكلمة
قالب طوب
تاخد ف إيد البنَّا شكل قلوب
ترسمها إيد الزاني
بنت لعوب
الكلمة نبضك فين تكون كانت
إتوضا قبل ما تنطق الكلمة
بالنار بصهد النار
بإحساسك
عديت علي جرحي
اللي شبعان كي
وبلاد كأنها زي تغريبة
ورأيت كأني رأيت بلا ريبة
شعري قالوه الناس
كتير قبلي
يا كلمة بنت بنوت
ما قالهاش حد
أنا نفسي أدخل بيكي
معني جديد
علي وزن عصف جنوني
مش تقليد
يا كلمة فُضِّي
بكارة الأسئلة
هزّي جذوع نخلك
وهاتي الرطب
صدري عطب
ريقي عطب صوتي
شايل غبار إحساس
بلا عنوان
من كام ملل
من كام شجر عريان
من كام شروع
في اليأس
م الحرمان
سايق عليكي الخلق
إنس وجان
تتّرجمي
يتّرجمك شوقي
مين اللي أولي
بنطفة المجنون
طيري علي جناح
ارتكاب زلزال
يثبت محال
ويعدّل القوانين
يا كلمة شيلي
من عرق ناسي
واتعمدي بأنفاسي
بالتنهيد
إتشطفي من عار
عجين بلا عيش
وانفلتي ما تعدّيش
علي الغربال
يا كلمة شكل الناس
بلا مكياج
وبدون سياج
وبدون نقط تفتيش !!.