رئيس مجلس الإدارة : ياســـر رزق       رئيس التحرير : طارق الطاهر
ساحة الإبداع

أربع حيطان


رمضان أبو الليل
2/9/2019 12:07:23 PM

أربع حيطان
والدنيا ضاقت ع الونس
المكتبة والسقف
وشيش موارب ضحكته
وحنين لذكري بتعض
في صباع الزمن
وعنين ترخ الدمع
ع الأسفلت ف تعوره
تنهيدة الشعر ف سطور
تنهيدة الآهة ف قلق
أربع حيطان
والشمس بتلم الضفاير
لجل مايزيد العتم
النور بيتسحب خفيف
من عقب باب مقفول
واللمبة غرقانة ف ذهول
الليل كفيف من غير ونس
والسكة مش خطوة
الرحلة بتطول
ومفيش رفيق هيبل ريق الضحك
لحظة وجع
الكدابين في الزحمة
بيزيدوا الجفا
والمغرمين بالشعر
صاغوا الحياة بالفلسفة
والصدق فرشة خيش
مطوية في جدار الزمن
ومفيش إيدين للوقت
هتحس بدفا
أربع حيطان
وعنيا غاوية تحضنك
من غير خشا
مش ذنبي  ان كلامك
زي حب الندي
ولا ليا ذنب ف ضي روحك
لما نجا من الغرق
كام مرة حاولت مرسمكيش مدينتي
صرخت قصايدي في الورق
أنا نفسي أقولك بحبك
واغزل في روحي نجمتين
من ضي روحك في الفضا.