رئيس مجلس الإدارة : ياســـر رزق       رئيس التحرير : طارق الطاهر
ساحة الإبداع

آخر ورقه في دفتر الشعر


حسام العقدة
4/6/2019 3:19:03 PM


يا حبيبتي..
بعد دقايق..
من آخر كلمات في قصيدتي
هابقي ف عالَم تاني.. بعيد
ده قراري
آسف.. سامحيني
مش قادر أتحمّل..
ألم العيشه وحيد
ولا قادر أكون فتي أحلامك
ولا قادر أكتب أي قصيدة..
مُمِلّه.. جديده
مش حقيقيّه.. ولا تشبهني..
زي ما قولتي..!
مش لاقي حلول..
ولا عارف أعمل إيه..
أنا دلوقتي.. مالي جيوبي..
بحجاره شَبَه قلبك
أول ما هتوصل لِك آخر كلماتي..
هاحدف نفسي..
من علي سُور الموت
وسط النيل
واغرق في جبال الضلمة
قبل امّا يضيع باقي صوابي
واتجنن..!
آسف..
مش هاقدر أكمِّل باقي حياتي
فاقد وعيي.. وتركيزي
باسمع أصوات في دماغي
علشان كده..
قررت أنهي حياتي
ما انكرش.. إني قضيت ويّاكي
أحلي دقايق عمري!
علشان كده..
مش عايز اكون عائق في حياتك
الفكره بقالها كتير بتلح عليّه
والحل ده.. هيكون آخر مأساتي
إيّاكي تقولي..
إن انتي سبب موتي
لكن قولي.. إن انتي
كنتي حياتي..
مضطر أسيبك..
عايز أسافر.. باحلم إني أطير
وأوصل للشمس اللي مبحلق فيها
لدرجة إني بقيت
مش شايف حاجة
باحلم إني أطير..
لكن جسمي تقيل
مش مساعدني
مش هتلاقي رسايل تانية
تسبب لِك إزعاج..
ولا هتلاقي  ردود لرسايلِك..
بعد كده
هامشي واسيبك دلوقتي
وهاقول لِك آخر مرّة..
وداع.