رئيس مجلس الإدارة : ياســـر رزق       رئيس التحرير : طارق الطاهر
كتابة

قصائد لعبد الناصر علام


4/21/2018 12:33:41 PM

بيوت بلا جدران

فلتسترح
استلق علي ضهرك
غمض عينيك
وانزع همومك »م»‬ اللي كان حواليك
اسحب نفس
واطرد بقايا الغلب من صدرك
مقهور دا دورك فاعمله بإتقان
متهان ومهمل ..حافي أو عريان
انت البطل »‬ع» الورق
وانت اللي دمه اتحرق
وانت اللي حلمه اتسرق
من سالف الأزمان

>>>

انت اللي معدم ضحكتك تغنيك
محسود علي المواويل
محسود علي أغانيك
عارف فصول العام ومتصاحب
راكب بساط الريح ببعض الرضا
وتصارع الآلام بكتم الآه
تفرح يزيد الفرح من جواه
ياعليل بلا أدوية
ياعليل بلا طببا
من وانت في اللفة لحد المشيب
أجر الطبيب يقتل
أجر الطبيب يفتل حبال موتك
برشامة تمحي الصداع
خليك في ملكوتك
وماليكشي دعوة بدعوة الطالعين
علي كتفك انت الباني بيعلي
ووراك في ضهرك وانت بتصلي
بالغدر يطعن فيك ..
والطعنة بتجلي
فان قالوا شد الحبل هاتشده
وان قالوا هد الجبل ..
بالصبر هاتهده
انت اللي علي ضهرك كتير ياما..
كتير عدوا
انت اللي مهمل في التاريخ والقصص
وانت اللي ينساك القلم
وان يكتبك ..
فبتبقي في الهامش ..
بهدومك الرثة
وبشعرك الأشعث
لا معاك مرايا تبص فيها عليك
ولا يشغلك .. جلدك إذا اتكرمش
حتي النهاية بتحملك رجليك
وان زاد عليك الحمل .. حماله
وان كنت عضم »‬ف» قفة  ليك الحكم
تصلح مابين الزعلانين وتلم
يحتاروا فيك الحكما أهل العلم
علي ربوة الأفكار بتتربع
وماليكشي دعوة بالشاشات
ولا بالوشوش القلابات
وعليك طوال الوقت ندر
ياتوفي ندرك .. يا الزمان يطويك ..
من قبل ماتكمل بناك
ما أطولك بالا.. لكسر الملل
هادي وقليل الغضب
راضي بعطاء السماء
وان قل فيها العنب
ملكوت بلا كرسي
ملكوت بلا خدام ولا وزرا
قرآن مبروز صورة العدرا
في بيوت بلا جدران ولا أسقف
لكن إذا حبيت تخش البيت بتستأذن
وإيديك تصقف ويا ..صوت خاشع
يا اهل الله يا اهل الدار
يا اهل الله ياااساتر  





النور فضا ..
والضلمة ضيق
والليل حنون ..
ستار يكون..
فضاح وبيشق السكون
حين تتصلب فينا الدموع
ويجف ريق
انا رحت بوحت  كتير كتير
وكتمت سر الغير في بير
ورسمت هيئة طير يطير
قلبي يامتحاط بالسياج
السرب هاج
السرب هاجر »‬م» البلاد
السرب هاجر للبلاد
والعتمة موت
والزنقة خانقة الكل
بزرار الريموت
الكل باصين »‬ع» الأمل
راكبين جمل
ياعمي يابتاع الفكك
ياعمي يابتاع الفكوك
رجعلي حلمي  ..حياة أبوك
وانا مستعد العد لنجوم السما ..
والأمر عادي
وان كان في عز الضهر انا ..
انا برضو راضي
أنا لو ها اعدي »‬ف» وسط جمر
انا لو ها ادوس علي تل شوك
فابعتلي حلمي بالعجل
وياريت تزول عني الشكوك




هااستني بس يحلها المولي
يتلم عضم الميتين »‬م» القدم
ما يهمنيش البير إذا اتعكر بوقع القدم
وان كنت حالف قبل منها يمين
عين دمعها .. بيفيض.. وبيفور »‬ع» الخدود
الورد مسقي بشوق »‬أناس» عطشانين
وتراب عذاب الحفاه
وأنين طحين العراه
دايسه الرجول في الفلاة
تايهة ومالهاش دليل

>>>

الراحة بعض العلاج
الراحة داء ..لا دواء
في النور ما يلزم سراج
والعتمة في القمرة تاج
 أنا قلبي سكر ودايب
والكاس علي الخلق داير
والعقل غاب »‬م» العجايب
دوامة تولد دواير

>>>

ضلت خطاوي طريقي
والضيق بيكتم خنيق
يا موصل الجوابات لناس حالمين
ومقصر المسافات علي الغايبين
مشتاق بيندغ في الليالي يلوك
»‬يشتر» كل البر يطحن شوك
مماليك حياري وجدهم يبسط
وهزار أبوهم جد وبيحبط
عديت مواني وغابات
وأخدت أهل النمل عبرة وآيات
نبوتي مهزوز كالعجوز ..علي عكازات
ينفعشي أرقص بيه
ولا من إيديا ارميه
بصيت علي الحاضرين بنظرة رضا
وعرضت عمري »‬ف» زحمة الدكاكين..
يابضاعة  بايرة برغم أصالتها
رقصت بنية »‬ف» قلب صالتها
ولا حد بص لها وعبرها
رجعت وأكلت تاني بصلتها
سرقتني نفس الضحكة نفس العين
وانا النحيف البدين
وانا السخيف الرزين
ترزي الجسد ما يهمهوش هوه فين
اشتقت للهيصة
أطنان ودخان كثيف
بيخطي عري الزيف بتوب شفاف
يبقوا الخفاف الظراف
علي طرف سجادة صلاه قاعدين
يا مثبت المسامير في حيط هشة
فك الخيوط من بعض وحياتك
طوقك نجاتك في انتظار الحكم
سيف واللا خنجر كله نحر وطعن
عاشقة الشوارع لليفط بالليل
والرحلة فركة إيد
والرحلة حمل خفيف وحمل تقيل
خفف هدومك والبس الإكليل
الورد آخر شم هاتشمه
    
>>>


عم سعيد .. يا عم سعيد
قلبي »‬ف» غربة وعيدي بعيد
شوك في إيديا  ..وخوف حواليا
والكفين لابسين في حديد

>>>

العملية.. في النملية
والعمي فيكم .. مش في عينيا
ناموا.. ارتاحوا..
ولا نوم  ليا
بيني وبين أحلامي.. بعيد

>>>

مدفون تحت الأرض بسنّة
أدّيت فرض.. وأديت سنّة
رايح عادي.. راجع عادي..
نفسي أقول يا بلادي ..بلادي
بااطلع مش حافظ ..وبليد

>>>

أهلا.. أهلا.. والعيد صرخة
حلق وامسك.. رجل الفرخة
واحد شد ..وواحد أرخي
ما اتبقاش من حلمي رصيد
عم سعيد.. يا عم سعيد.